Jaamacadda Muqdisho oo ka mid ah jaamacadaha faro-ku-tiriska ah ee laga helo aqoon tayadeedu sarreyso ayaa shahaadooyinka ay bixiso waxay heleen aqoonsi heer caalami ah. Shahaaddooyinkaas aqoonsiga helay waxaa ka mid ah tan ay bixiso kulliyadda caafimaadka ee Jaamacadda, gaar ahaan qeybta waxbarashada Kalkaaliyenimada (Nurse).
Arday cilmiga caafimaadka ka bartay Jaamacadda Muqdisho oo dalka Mareykanka u wareegay ayaa waxay shahaaddooyinkooda u heleen aqoonsi, iyagoo fursad u helay in ay Mareykanka gudahiisa uga shaqeeyaan wixii ay kusoo barteen Soomaaliya, gaar ahaan Jaamacadda Muqdisho, iyagoo aan weliba lagu xirin shuruud ah in ay sammeeyaan dhammeystir, sida in ay wax sii bartaan ama ay tababar sammeeyaan.
Luul Maxamed oo cilmiga kalkaaliyenimada baratay iyo Elias Abdi oo ka mid ah ardayda ka af-laxay Jaamacadda Muqdisho ayaa waxaa shahaadooyinkooda aqoonsaday Guddiga Mareykanka u qaabilsan qiimeynta Ardayda Kalkaaliyenimada kusoo barta mareykanka dibaddiisa, waxaana la siiyay aqoonsiga ah in cilmiga ay soo barteen uu la mid yahay midka ardayda mareykanka wax ku barta.
Luul Maxamed oo ammaantay Dr. Abdullahi Aseyr oo ka mid ah guddigii aas-aasay kulliyadda ay ka af-laxday ee cilmiga barashada Kalkaaliyenimada o ayaa sheegtay in ay aad ugu faraxsantay in ay aqoontii ay ka heshay Soomaaliya, gaar ahaan Jaamacadda Muqdisho ay la mid tahay aqoonta ay helaan ardayda mareykanka ku nool oo kale.
Elias Abdi oo Shahaadada Doctorate ku diyaarinaya dalka Mareykanka ayaa isna u mahadceliyay Dr. Caseyr isagoo sheegay in ay natiijada qiimeynta Shahaaddada Kalkaaliyenimada ee laga qaato Jaamacadda Muqdisho ay muujineyso in la isbarbar dhigi karo Jaamacadda Muqdisho iyo Jaamacadaha Mareykanka, marka ay timaado aqoonsiga cilmiga Kalkaaliyenimada bacdamaa aan loo baaheyn dhammeystir.
Isku soo wada duub, ruqsadda Wasaaradda Caafimaadka ee Kalkaaliyayaasha Soomaaliyeed iyo diiwaangelinta Shahaaddada Kalkaaliyenimada ee Jaamacada Muqdisho ay sammeyso ayaa keentay in la isbarbar dhigi karo Kalkaaliyayaasha wax ku barta Soomaaliya iyo kuwa Mareykanka gudahiisa wax ku barta.
Jaamacadda Muqdisho oo ka mid ah Jaamacadaha tayada leh ee Soomaaliya ku yaalla ayaa la aas aasay sanadkii 1997, xiligaas oo dalka Soomaaliya aysan ka jirin wax dowlad ah kaddib markii ay meesha ka baxday dowladdii dhexe sanadkii 1991-kii.
Salad Iidow (Xiis)
