Diyaar garowgii ugu danbeeyay ee ku saabsana munaasibada Ciidul Adxada ayaa laga dareemaya badi Sayladdaha xoolaha ee Somaliland.
Meelaha sida weyn diyaar garowga saxmadda Ciidu uga muuqaneyso waxaa ka mida Sayladda xoolaha ee magaalada Hargeysa, sicirka lagu iibinayo xoolaha gaar ahaan Adhiga ayuu hoos u dhac ku yimid.
Sannad walba marka la gaadho wakhtigan oo kale ee ay maalmo koobani ka hadhsan yihiin Ciida Arafo waa wax iska caadiya in isbadel uu ku yimaado qiimaha la kala siisanayo xoolaha noocyadooda kala gaddisan, balse sannadkani waa uu ka duwan yahay sannadihii la soo dhaafay taasi oo ay sabab u tahay xannuunka safmarka ah ee Covid-19 oo hoos u dhigay dhaqaalihii dalka iyo dadka, iyada oo aanay jirin xoolihii dhoofi jiray.
Dhanka kale dadka xoolaha ka ganacsada ee soo iibsadda dibna u sii iibiya ayaa sheegay in hoos u dhaca ku yimid iibka xoolaha uu saameyn ku yeeshay xoolahooda taasina ay sababtay in macaashkii ay heli jireen uu yaraado “Xoolaha waala iibsanaya, kuwa waala celinayaa, xooluhu waa iska sicir suuq xoolaha waanu soo iibsanaa mukhaarish lacag aan nagu aheyn mararka qaaar waanu siinaynaa, mararka qaarna waa naloo gaadhaa sidii ay ahaan jirtay Sayladu iibku imika aad ayuu uga hooseeyaa waxaana sabab u ah xannuunada soo kordhay iyo waddamada kala xidhan, Wanka weyn ee aanu markii hore siin jirnay 120-dollar imika 80-dollar ayaanu siinaynaa, waa Ciid jawigu waa uu fiican yahay balse sidiisii looma gaadhayo wakhtigaana sababay”
Maxamed Diiriye Jaamac kana mida dadka u soo xoolaha doontay Saylada xoolaha ee magaalada Hargeysa, si uu neef maalinta Ciida uu qasho uu uga iibsado ayaa ka waramay sicirka laga siiyay neefkaasi “Wananka iyo Iduhu waa ay kala duwan yihiin xagga iibka sababto ah Wananka boqol dollar ayaa ugu yar, balse laxdan waxaa la’iga siiyay lix boqol iyo konton kun oo shilinka Somaliland ah, waa ILLAAHEY mahadii, carruurtana waan u qalayaa Jidka Siraadna waxaan doonayaa in aan fuulo oo ay igala baxdo ayaan doonayaa Wanka iyo Laxduna waa isku mid xaga diinta oo in aad wuxuun qasho ayaa la doonayaa, ciyaalku waa ay ku farxi doonaan marka aan dhex geeyo hadii ILLAAHEY yidhaaho, xoolihii Sucuudiga u dhoofi jiray ayaan jirin waana ta sababtay in ay xooluhu jabaan”
“Geeli wixii soo galay Saylada si fiican ayaa loo iibsaday oo wax foofay ma jiro, geelana neef iyo sararkii ayaa la iibsanayaa, kuwa dhaqmaadka ahi iyagu waa qaali, kuwa hilib ahaantuna iyaguna waa qaali, ma xuma suuqa kala iibsiga geela ee sayladu”Ayuu yidhi mid ka mida dilaalinta geela iibisa ee Saylada magaalada Hargeysa maalin aad u baahan tihiin ayaad heli doontaan
