Filmka ‘dhallinyaro’ oo dhawaan Jabbuuti lagu soo bandhigay waxaa jilayaal ka ah saddex hablood, waxaana samaysay oo qortay sheekada Filmkaas Luula Cali Ismaaciil, waxa uu ku guulaystay billado badan, sida oo kalena jilaaga koobaad ee Deeqa waxay ku guulaysatay, jilaagii Geeska Afrika. Waxaa lagu metelay Jabbuuti, waana filimkii ugu horreeyey ee noociisa ah ee lagu soo bandhigo dalkaas.
Waa dhallinyar ku jira da’aadda 18 jirka, oo ku dhex jira nolol su’aalo badan, kuwaas oo ay ugu mudan yihiin waxbarashadooda iyo mustaqbalka wax barashadaas-ma dalka ayaad ku dhammaysataa? Ma qurbaha ayaad u aaddaa? Iyo weliba sidee isu qabadsiisa riyooyinkaaga iyo kuwa waalidkaa kula rabaan.
Marka la soo uruuriyo doorka ay qaadanayaan jilayaasha filimkaas, waxay kala yihiin: Asma, waa inan ku adadag waxbarashada, isla mar ahaantaana rejooyin kala duwan ka leh nolosha, si ay uga guul gaadho, iyadoo sida oo kalena ilaalinaysa saaxiibtinnimada qotoda dheer ee kala dhaxaysa saaxiibbadeed, waxay ka soo jeedda qoys dhaqaale ahaan hooseeya, ku se ad adag inay dhiirrigeliyaan oo qayb ka noqdaan inay meel la taaban karo ka soo baxdo. Hibo, waxay jilaysaa gabadh qalqaalliyad ah, furfuran isla mar ahaantaana ilbax ah, kana soo jeedda qoys hodan ah, oo ku oggol sida ay iyada wax la yihiin.
Iyo jilaaga koobaad ee ay ku socoto sheekada filimka oo ah Deeqa, waxay iyana jilaysaa gabadh deggan, caqli badan ahna isku xidhaha saaxiibtinnimada labada hablood ee kale, asee ku dhex wareersan rejooyinka ay leedahay hooyadeed oo garoob ah, taas oo rabta inay meel ka baxsan dalka waxbarasho u aaddo. Laakiin Deeqa, waxay rabtaa inay dhinacyada nolosheeda iyo rejooyinka ku gedaaman kaga guul gaadho dalkeeda hooyo, isla mar ahaantaana halkan wax ku barato.
“su’aalo badan bay dhallinyaradu is weydiiyaan, waayo waxay ku jirayaan xiliga ay jaamacadda u gudbayeen, waa xilligay hasaawaha u gudbayeen waa xilliga ay aad isula sheekaystaan, siiba waxbarashada ma jabbuuti bad ka dhigan? Ma meel kale oo dalka ka baxsan ayaad u aaddaa” Ayay tidhi Luula, oo filimkaas soo saartay ayaa BBC-da ugu warrantay xaaladdii iyo doorkii ay u martay soo bixidda filimkaas.
Waxay sheegtay ujeedkeeda koobaad inuu ahaa inay noolaysa doorka aflaamta ee dalkeeda, sida oo kalena ka jawaabto da’aadda dhallinyarta la yahay su;aalaha ku dhasha, siiba hablaha.
Jilayaasha filimkaas sida lagu soo xulay ayay sheegtay, iyana inay ka baadidoontay dugsiyada sare ee dalkaas, maaddaama aysan jirin dad Soomaali ah oo aflaamta jila, sidoo kale shirkado soo baadha dadkaas iyana aysan jabbuuti ku oollin.
Kaddib markii la soo bandhigay, sidii ay uga falceliyaan dadka Soomaalida ah iyo dunida ayaa ay Layla Cali Ismaaciil, soo saaraha filimkaasi sheegtay, in ay kala kulantay falcelin waaagsan. Hadday dadka kale iyo Soomaalida tahayba.
“Adduun weynahu si fiican bay uga heleen, dadka reer Jabbuutina si weyn ayay uga heleen, waayo waa sheekadoodii, deegaankoodii, xaaladdoodiina way taabanaysa. Waayo qofka kastaa mar uun buu yahay 18 jir ama 17 jir, markaa waxaan odhan karaa qof kasta way taabatay sheekadan”
