Kuuriyada Waqooyi ayaa farriin hambalyo dhalasho ah ka heshay madaxweynaha Mareykanka Donald Trump taasoo ku socota Kim Jong-un, balse waxay sheegtay in xiriirka shakhsiyadeed ee labadooda u dhaxeeya aysan ku filneyn dib u soo celinta wada xaajoodyada nukliyeerka.
Mr Kim ayaa laga yaabaa in shakhsi ahaan uusan necbeyn Mr Trump, balse dalkiisa kuma hoggaamin karo siduu isagu rabo, waxaa sidaa yiri Kim Kye Gwan oo la taliye u ah wasaaradda arrimaha dibadda dalkaas.
Wuxuu sheegay inaysan suurto gal ahayn wada hadallo, ilaa uu Mareykanku ka aqbalo dalabaadka Kuuriyada Waqooyi.
Xiriirka labada dal ayaa sii xumaanayay bilihii ugu dambeeyay.
Mr Kim iyo Mr Trump ayaa wada hadallo weji ka weji ah yeeshay sanadkii 2018 iyo sanadkii hore, kuwaasoo looga gol lahaa in Kuuriyada Waqooyi ay ka tanaasusho hubkeeda hukliyeerka, balse wada xaajoodyada ayaa hakad galay iyadoo Mareykanku uu diiday inuu cunaqabateynta ka qaado ilaa ay Kuuriyada Waqooyi si buuxda u joojiso hubka nukliyeerka.
Warsaxaafadeed lagu daabacay wakaaladda wararka dalkaas ee KCNA, ayuu Mr Kye, oo ah diblomaasi sare ku sheegay in Pyongyang aysan ku joojineyn hubkeeda nukliyeerka iyadoo ku beddelaneysa in si aan dhammeystirneyn looga qaado cunaqabateynta.
La taliyaha ayaa sidoo kale sheegay inaysan jiri doonin “wada xaajoodyo la mid ah kuwii ka dhacay Vietnam” – isagoo kala jeeda kulankii labaad ee ee Trump iyo Kim markaas oo ay Kuuriyada Waqooyi soo jeedisay inay burburiso xarunteeda nukliyeerka ee Yongbyon iyadoo ku beddelaneysa in laga qaado dhammaan cunaqabateynta saaran. Wada hadalladii sanadkii 2019, ayaa fashilmay kaddib markii uu Mareykanku diiday inuu cunaqabateynta ka qaado.
Horraantii bishan, Mr Kim ayaa sheegay in Kuuriyada Waqooyi ay ka baxayso heshiiskaas isla markaana ay soo saareyso hub casri ah. Balse wuxuu albaabbada u furay wada xaajood, isagoo sheegay in xaddiga tijaabada hubkaas ay ku xirnaan doontop sida uu Mareykanku u dhaqmo.
Waqooyiga ayaa tijaabooyin yar fulisay dhammaadkii sanadkii 2019, taasoo loo arkay inay cadaadis ku saareyso Mareykanka inuu aqbalo dalabkeeda.
Mr Kye ayaa sidoo kale xaqiijiyay in dalkaasi uu farriin shakhsiyadeed hambalyo dhalasho ah ka helay Trump, kuna socota sanad-guurada dhalashada Mr Kim oo la rumeysan yahay inay ku beegneyd 8-dii January, balse wuxuu sheegay inaysan caqli gal ahayn in la fisho soo celinta xiriirka labada dal.
Sidee ayuu xaalku heerkan ku soo gaaray?
- Guud ahaan sanadkii 2017, Kuuriyada Waqooyi waxay tijaabineysay ganatallo gaari kara dhulka Mareykanka.
- Bishii January 2018, Kim Jong-un ayaa sheegay inuu”diyaar u yahay wada xaajood” lala galo Kuuriyada Koodureed iyo Mareykanka.
- Mr Kim iyo Mr Trump ay kulan weji ka weji ah oo taariikhda galay ku yeeshay dalka Singapore bishii June 2018, iyagoo isku raacay baabi`inta hubka nukliyeerka.
- Kim Jong-un ayaa sidoo kale dhowr jeer la kulmay Madaxweynaha Kuuriyada Koofureed Moon.
- Bishii February 2019, wuxuu mar kale Donald Trump kula kulmay dalka Vietnam balse wada hadallada ayaa ku soo idlaaday heshiis la`aan.
- Bishii June isla sanadkii hore, waxay shir kale ku yeesheen aagga milatariga ka caaggan ee kala qeybiya Waqooyiga iyo Koofurta.
Balse xiriirka u dhaxeeya Mareykanka iyo Kuuriyada Waqooyi ayaa sii xumaanayay bilihii ugu dambeeyay ee sanadkii tegay.
La taliyaha ayaa sidoo kale uga digay Kuuriyada Koofureed inay isku daydo inay dhexdhexaadiso Mareykanka iyo Waqooyiga. Jimcihii la soo dhaafay, sarkaal ka socda Kuuriyada Koofureed ayaa sheegay in Mr Trump uu ka codsaday xukuumadda dalkaas inay farriin hambalyo dhalasho ah uga gudbiso Kuuriyada Waqooyi.
Mr Kye ayaa sheegay in Kuuriyada Koofureed ay xadkeeda soo dhaafeyso haddii ay dhexdhexaadiso xiriirka shakhsiyadeed ee u dhaxeeya Mr Kim iyo Mr Trump. Kuuriyada Koofureed ayaase diidday inay hadalkaas ka jawaabto.
