Manchester waa in ay diidaa taallada hoggaamiyihii xuriyadda Hindiya Mahatma Gandhi sababtoo ah “sida wanaagsan ayaa loo qoray in uu ahaa cunsuri nicib dadka madow”, sidaa waxaa sheegay koox ardey ah oo arrintan u ololeyneysa.
Taallada oo dherirkeedu yahay 2.75m, waxaa la siiyay golaha deegaanka Manchester, si ay ugu dabaaldegaan sannad guurada 150-aad ee ka soo wareegatay dhalashadii Gandhi.
Warqad furan ayey ardeyda ku dalbadeen in golaha uu garwaaqsado “hadalladiisii xumaa” iyo in raali gelin laga bixiyo arrimaha.
afhayeen u hadlay golaha waxay sheegtay in ujeedada taallada ay tahay “faafinta farriinta nabadda, jaceylka iyo naxariista”.
Warqadda – oo tixraaceysa ololaha baraha bulshada ee #GandhiMustFall – waxaa lagu muujiyay in ninkan gumeysi diidka ahaa uu dadka Afrika ku tilmaamay “wuxuush”, aan “il-bax ahayn” iyo “wasaq”, hadalladaas oo “si wanaagsan loogu diiwaan geliyay warqadihii ugu horreeyay ee uu diray”.
Waxay dhallinyarada ardeyda ah intaa ku dareen in dowladda hadda ee Hindya ay Gandhi “u adeegsaneyso dacaayad ahaan”.
“Waxaan dalbaneynaa in Golaha Deegaanka ee Magaalada Manchester uu diido in qeyb uu ka noqdo arrintan, si gaar ah iyadoo la eegayo sida magaalada ay uga hortagtay ficilladii cunsuriyadda.”
Waxay sidoo kale dalbadeen in Galuhu uu “dib u soo celiyo” dhaqaale kaste oo la isticmaalay “laguna maamuuso madowgii cunsuriyadda la dagaallamay ee Manchester, sida Olive Morris ama Steve Biko”.
Cunsuri ma ahaa Mahatma Gandhi?
Wuxuu ka dhashay Mohandas Karamchand Gandhi oo ah qoys caan ahaa, sannadkii 1869-kii, wuxuuna aaday Koonfur Afrika sannadkii 1893-dii, halkaas oo uu ku arkay dhibaatadii loo geysanayay Soo galootigii Hindida ahaa.
Ninka qoray Taariikhda Gandhi oo uu awoowe u yahay, Rajmohan Gandhi, wuxuu sheegay in shaki la’aan “uu xilligaas ahaan qof aan aqoonin naceybka dadka madow ee Koonfur Afrika,” balse “wanaagga Gandhi wuxuu ahaa mayil adayg iyo horumar jaceyl, marka loo eego dadkii ay isku midka ahaayeen”.
Qoraayaasha kale waxay ku doodeen wixii uu uga tagay xilligan hadda la joogo – Ramchandra Guha wuxuu qoray “in laga hadlo sinaan ballaaran ay helaan dadka midabada leh ay curdun ahayd horraantii qarnigii 20-aad ee Koonfur Afrika”.
Sidoo kale, Ashwin Desai wuxuu ku tilmaamay in Gandhi uu ahaa nin “taageeray canshuur badan oo la saaro dadkii saboolka ahaa ee Afrika, isagoo iska indha tiray ficilladii xumaa ee boqortooyada ay ku haysay dadka madow”.
Afhayeenka u hadlay Maamulka Manchester waxay sheegtay in aysan jiri doonin “wax Galaha ka soo gaaraya taalladan”, taas oo la marsiiyay “dhammaan qorshayaashii loo baahnaa” bishii August, mana jirin cid diiday.
Waxay hadda ku xareysan tahay baqaar, wuxuuna qorshaha yahay in Manchester lagu soo bandhigo bisha soo socota.
Waxay tiri “inkastoo goluhu ka war hayo in ay jirto dood ku saabsan noloshii Gandhi”, in haddana dadka badankoodu ay arki doonaan taallada oo magaalada ay siisay laanta Shrimad Rajchandra Mission Dharampur (SRMD), “Macnaha guud haddaan ka eegnana, ujeedadu waxay tahay faafinta farriinta nabadda, jaceylka iyo naxariista”.
Afhayeen u hadlay SRMD wuxuu sheegay in taallada ay tahay “mid aan siyaasad ahayn, sidoo kalena aan xiriir la lahayn dowlad”.
Hay’addu waxay soo dhoweysay “baaritaan lagu sameeyo waxa ah dadka hadal hayaan ee la soo dhaafay, balse waa marin habaabin in lala eegto haddal uu Gandhi sheegay xilligii uu dhallinyarada ahaa”, ayuu yiri.
“Gandhi wuxuu dhiiragelin u noqday hoggaamiyayaal Afrikan ahaa, sida Nelson Mandela, dalabka noocan ahna waa fasiraad aad u kooban oo isaga laga bixinayo.
“Mahatma Gandhi waa muwaadinka caalamka oo dhan, waana astaanta nabadda. Taallada Manchester waxay dabaaldeg u tahay awoodda caalamiga ah ee farriintiisa”.
