Madaxweyne Ku Xigeenka Jamhuuriyadda Somaliland Mudane, Cabdiraxman Cabdilaahi Ismaaciil (Saylici) ayaa maanta ka qeyb-galay soo dhaweyn
loo sameeyey 20 ka mida Shaqaalaha Dawladda Somaliland oo kasoo qalin jabieyey Jaamacada Shaqaalaha Dawladda ee heerka labaad ee Waxbarashada.
Shaqaalahan oo in muddo ah Waxbarasho ugu maqnaa Dalka itoobiya kana soo qalin jabiyey heerarka kala duwan ee Barashada, oo Xafladaasi ka hadlay ayaa shaaca ka qaaday inay diyaar u yihiin u dhibirsanaanta shaqada qarankooda islamarkaana sheegay inay dalkooda iyo dadkooda gelin doonaan wixii aqoon ah ee ay soo barteen.
Madaxweyne ku xigeenka Jamhuuriyadda Somaliland Mudane, Cabdiraxmaan Cabdilaahi Ismaaciil (Saylici) oo halkaasi ka hadlay ayaa hambalyo balaadhan u diray ardaydaasi wax usoo baratay qarankooda, waxaana uu ku ammaanay dedaalka iyo dhabar adaygii ay sameeyeen mudadii ay ku jireen Waxbarashada Itoobiya.
Madaxweyne ku xigeenka waxa kale oo sheegay in loo baahan yahay in wakhtigan uu Maxadka Shaqaaluhu noqdo mid isagu kaafiya waxbarashada heerkasta oo ay ahaataba, islamarkaana ay lagama maarmaan tahay in awood iyo maskax la geliyo sidii loo horumarin lahaa Maxadka shaqaalaha dawladda ee CSI.
Waxa uu Madaxweyne ku xigeenku ku dardaaray ardaydaasi wax kusoo baratay Waddanka aynu jaarka nahay ee Itoobiya ay laban laabaan shaqadii ay qarankooda u hayeen, waxaana uu si gaara u hambalyeeyey 4 Hablood iyagu ka mid ahaa Ardaydaasi waxbarashada soo dhamaysatay.
Gebogebadiina Madaxweyne ku xigeenka Jamhuuriyadda Somaliland waxa uu shahaadooyin maamuus iyo dhiirigelin ah gudoonsiiyey ardaydaasi.
