Sanado door ah ayay shidan tahay colaada ka oogan Ceel-afweyn, taasoo dhextaala bulsho wadaagta dhalasho, xididtinimo, Diin, Dhaqan iyo ehelnimo, kuna wada nool hal bay’ad ah oo ay ka jirto duruufo qalafsan oo dhinaca horumarka binu-aadamka ah, sida jidadka, waxbaashada, caafimaadka, Biyaha, iyo inkaaniyaadka kale ee saldhiga u ah horumarka bulshada, haddii caqli iyo wadaniyadi jirto, waxay ahayd in bulshadaasi ay xoogeeda, caqligeeda, iyo maalkeedaba u jihayso si wadar ah horumarinta deegaamadooda ay baahida badani hadheeysay, ee may ahayn inay iyagu iskula jeestaan oo ay is wiiqaan, may ahayn inay ilaawaan Xikmadda Soomaaliyeed ee tidhaahda DHUDHUNKAAD I GOYSAA KA DHANTAALAN KAAGOO, LABADEENU DHUUN IYO MOQOR BAAN KA DHIGANEE|
Marka intaas laga yimaado, dad badan oo indheer-garad ah ayaa rumaysan inaanay colaadda Ceel Afweyn ka taagani ahayn mid dhaqan ee ay tahay mid siyaasi ah, oo ay dabada ka riixayaan kooxo masaaliix siyaasi ah iyo mid Dhaqaaleba ka lihi, Somaalidu waxay ku maahmaahdaa, HADDII AAD ARAGTO ARIN DHAMAAN WAAYA, AMA ARIN MEESHA KU JIRA AYAA LAGA SAARAYAA, AMA MID AAN MEESHA KU JIRIN AYAA LASOO GELINAYAA, Cajaaib, nin kale ayaa laga hayaa xikmad taariikh ka tagtay oo tidhaahda HASHU MAANKEYGA GADAYE, MA MASAAR BAY LIQDAY, dhawaan uun bay ahayd markii madax dhaqameedka Beelaha H/jeclo ku dhawaaqeen inay Gogol turxaan bixineed u fidinayaan dhigooda Garxajis, taasoo bilowgiiba aan raaligelin madaxdda sare ee xukuumadda Somaliland, oo u arkay inay halkaas kazoo fool leedahay xulufo cusub oo siyaasi ah oo aan mustaqbalkooda siyaasadeed dan u ahayn, inkastoo markii danbe uu Madaxweyne Biixi u ayiday shirkaas si daadraacin ah, ayidaadaas oo u muuqatay mid iska ahayd Nin Geenyo dabadeed ka dgay meel kale oo uga toolmoon ayuu waayay.
Maalin ka hor xiliga ay fidnadu ka oogantay Ceel-Afweyn, ayaa madax-dhaqameedka beelaha Garxajis ku dhawaaqeen inay aqbaleen gogosha ay u fidiyeen Dhigooda H/jeclo, iyadoo nuxurka gogosha la dhigay ujeedadeedu ay u weynayd arinta Ceel-afweyn iyo arimo kale oo muhiim u ahaa labada geesood, balse, intii arimahani socdeen, waxaa baal guranayay dadyow laga hadlinayay oo si xanaf iyo buqdi ku jiro uga horyimi Gogoshaas, iyagoo sheegayay iinaanay jirin sababo ay u shiri karaan qabaail aanay weli dhiigoodii kala qalalin, dhawaaqan oo ahaa mid siyaasi ah oo lagu fashilinayay dhaqdhaqaaqyadaas socday ee ay madaxdhaqameedka labada dhinac wadeen, isla markaana ay dbada-ka-riixayeen kuwo waqtigu fashilin doono, nasiib darro-se, natiijadda dhawaaqyadaas buqdiga watay, iyo kuwo badan oo kale oo huursanaa oo lagu wiiqayay wanaagii socday ayaa noqday waxa saaka taagan oo ah wax aan cidnaba raaligelin marka laga tago kuwa fidno-walayaasha ee labada dhinac kazoo kala jeeda ee la isticmaalayo.
Hadaba, Su’aasha dad badani is weydiinayaan waxay tahay, Maxaa isku beegay Shirka beelaha Garxajis iyo Habarjeclo ee la mudeeyay 20/7/2019 iyo shaqaaqdan hadda tafaha xaydatay? Ma u-egtahay mid lagu hantaaqaynayo shirkaas oo aanay kooxo badani dantooda siyaasiga ah ka dhex arkeynin? Mise arintu waxay leedahay mid ka gedisan sawirka iiga dhex muuqda?
Dhinaca kale, Mee Doorkii waajibka ku ahaa madaxweynihii dalkan loo doortay iyo intii uu igmaday? Ma waxa damiirkiisu siiyay inuu qasriga madaxtooyada Hargeysa iska dhex fadhiyo iyadoo dakiisii uu isku hoobanayo? Haddiise, aanay xukuumadda jirtaa qayb ka ahayn dhibka yaala Ceel-afweyn, maxay u heli wayday cidda dhibka dabada ka riixaysa, oo ay taalabo uga qaadi weyday? Dawlad leh 15,000 oo ciidan ah, sirdoonkedii leh, laamaheedii kala duwanaa ee aminiga iyo xuuraanka leh, haysata inkaaniyaadkii kale ee dawliga ahaa oo wax badan u suurtagalin kara ayaa xal u heli la’a dhibka Ceel-afweyn yaala,waa arin aan caqliga ka degi Karin, arintuna waxay daaran tahay, ISLAANTII TIDHI, NNKA XOGGAAS LIHI, INANTAYDA KAMUU ILMO-DHALI WAAYINE, WUU HAGRANAYAA.
NB: Cidna umaan dhaweyn ee Cidlaan dhaabay warankas.
Qora “Hussen Luck Maxamed
