Waxa ay saaka xiisad colaadeed ka taagan tahay deegaanka Tukaraq ee gobolka Sool, oo ay isku horfadhiyaan ciidamo kala taabacsan maamulada Somaliland iyo Puntland.
Xiisada laga dareemayo deegaanka Tukaraq ayaa waxa ay timid kadib markii Gaadiid dagaal oo ay leedahay Puntland saaka ay gudaha u galeen deegaanka Tukaraq.
Ciidamada Puntland ee saaka galay deegaanka ayaa durba bilaabay dhaq-dhaqaaqyo ciidan waxa ayna saaka gaaren jiida hore ee dagaalka taa oo sababtay xiisadda halkaa ka taagan.
Dadka deeganka waxa ay soo sheegayaan in rasaas goosgoosa ay xalay ilaa saaka ka dul dhaceysay taa oo ay ridayeen ciidamada maamulka Somaliland oo difaac ku jiray.
Sidoo kale, waxaa shalay deegaanka gaadhay ciidamo ka tirsan maamulka Somaliland iyo saanad ay wateen kuwaa oo sabab u noqday dhaqdhaqaaqa sii xoogeysanaaya ee saaka laga dareemayo Tukaraq.
Docda kale, Xiisadan ayaa imaaneysa iyada oo maalinimadii shalay aheyd, guddiga difaaca Puntland ay sheegeen in dagaal uu ka dhici doono, deegaanka Tukuraq, nabadna aysan jiri doonin inta gobollada Sool iyo Sanaag ay Somaliland ku sugantahay taasi oo ay u eeggahay in maamulka puntlan hogaanka kusii adkaysanayo.
