Somalidu waa bulsho hadal ku nool ah, wakhtigooda ugu badana waxay ku lumiyaan ka sheekaynta iyo faaqidaada dhacdoonyinka dunida ku soo kordha, ku waa soo doorka ay ku leeyihiinna aanuu dhaafsiisnayn hadal aan ficil la socon.
Hadaba waxay daraasado la sameeyay sheegayaan, in hadal badnaanta ku salaysan malo awaalka iyo iskacaabintu ay yarayso in uu ruuxo si fiican u tuujiyo masgaxdiisa, islamarkaana uu u fikiro si indheeragnimo iyo aragti fogaani ku jirto.
Sidoo kale haddii ay bulshada dhexdeeda ku faafaan wararka ku salaysan ku-tidhi ku-teenta iyo malo awaalku, waxay bulshadu ka dhaxashaa qalalaase iyo iska hor-imaadyo aan loo maaro helin, ku waa soo marka danbena sabababa in ay bulshadu ka leexato jahadii ay u socotay.
Marka uu borobagaanduhu yahay isha ugu weyn ee wararka laga soo xigto, go’aamaduna noqdaan kuwa aan xaqiiq ku salaysnayn, waxa uu xaalku ku danbeeyaa walaahow iyo bulshadoo kala irdhow.
Waxa kale oo laga dhaxlaa seddex sifo oo foolxun, ku waa soo kala:- tabcasho la’aan, tafaraaruq iyo talo xumaan.
Si kastaba ha ahaatee waxa hubaal ah in mushkiladaha ina haysta ay ka mid-yihiin isu-tabinta sheekooyinka gacan ku samayska ah, ee laga soo alifo meelaha ay dadku ku kulmaan, sida muqaaxiyaha majaalista lagu qayilo.
Markay aragtida iyo afkaartuba ka soo maaxdaan masgaxo ay daashadeen malo awaal iyo muran aan dhamaad laynin, garashaduna waxay noqonaysaa mid saboosha oo aan gudan-karin waajibaadkii saaraa.
Sida ay taariikhdu ka markhaati furayso bulsho kasta oo ku saaqidaan tabinta sheekooyinka curiska ah ee aan ku dhisnayn danaha iyo masaaliixda la wagaago, waxay ka dhaxashaa bulshada oo kala tagta, dhexdeedana ay ku faafaan khilaafyo huursan oo dami-waayaa.
Waxa kale yaraada hanka iyo himilada ka hugmaysa laabaha dadka hogaanka u ah, waxaanay noqdaan kuwo ay daashadaan fashilaad iyo guuldarooyin siyaasadeed oo joogto ahi.
Haddii ay cabiraan aragtidooda siyaasadeed ee ay maanka ku hayaanna, waxay noqotaa mid aan soo jiidanaynin qalbiyada dadka ay u tabinayaan, maxaayeelay kama turjumayso baahida dhabta ah ee ay dadkani la dayaysan yihiin.
Borobogaandaha iyo qabyaalada isxambaarasani waa tiirka koobaad ee ay ku qotomaan mashaakilo taxane ah oo sida dabaylaha u ruxaya bulshadeena, waxaana tusaale loo soo qaadan karaa seddex CAQABADOOD oo laf dhuub gashay ku noqday, taabo galinta hanaan dowladeed oo hufan, iyo shacab walaalo ah oo si wadajir ah noloshooda maareeya.
CAQABADA 1aad: waa sida bulshada loogu kala qaybiyo dano ay kooxo gaar ahi leeyihiin, ku waa soo qastiga iyo ujeedada ay ka leeyihiinna ay tahay in ay shacabkan gaajaysan ka dhigtaan salaan ay ku fulaan mansabka iyo manfaca ay sida daran u raadinayaan.
Xaaladaa uurkutaalada leh ee shacabkani la baaxaa-dagayo waxa hogaamiya kooxo xariif ku ah sida layskaga keeno ilmada yaxaaska, ku waa soo iska-oohinta iyo isbihin-bihinta ay qalbiga ay kaga xadayaan masaakinta ay nolosha ka qafaasheen aad u malaynayso in ay xaq ku taagan yihiin, sidoo kalena ay yihiin dulmanayaal laga duudsiyay xaqii ay lahaayeen.
Waxay inta badan kooxahaasi ku ugaadhsadaan magaca reerka ay ka dhasheen, waxaanay ku beer-laxowsadaan in ay yihiin diranayaal u taagan ilaalinta iyo difaacidda xaqa reerku uu leeyahay.
Waxay’se ujeedadooda tahay in ay ku ugaadhsadaan magaca reerka ee ay ka dhasheen.
Markay dhawaaqooda dhiilada leh dhagaha ugu ridayaan danyartan silcaysa, waxay si xirfadaysan u adeegsadaan warar borobogaande ah, oo ay ku xanta-xanteeyaan dareenka qabyaalada ee ay bulshadeenu u nugushahay.
by Cumar Axmed Cali.cumaraxmed331@gmail.com/0634244802.
