Qoryaalenews(Hargeysa):- Dhawaan ayey ahayd markii madaxwaynaha Somaliland madaxwayne Muuse Biixi Cabdi uu go’aan adag ku laaley dhulka raasiga ah ee Berbera. Kaasi oo muhiimad weyn u leh dekadda magaalada Berbera oo ah tan maanta Somaliland maceeshadaha ugu badani ka soo deggaan isla markaasina ah dekadda koobaad ee Somaliland wax ka dhoofiso. Dhulka raasiga Berbera ayaa hore waxa loo siiyey ganacsato iyada oo la sheegay in laga iibiyey oo dhaqaalle badan uu hadda ka galey. Madaxwaynaha Somaliland Muuse Biixi Cabdi waxa uu si cad u sheegay in dhulkaasi uu yahay dhul ay dawladdu iska leedahay isla markaasina uu hakiyey dhammaan shaqooyinkii ka soo socdey.
Haddaba garyaqaanka guud ee Somaliland Cabdisamad Cumar Mal oo maanta mid kamid ah warbaahinta kulla hadley gudaha Hargeysa, waxa uu digniin u direy cid walba oo ka hortimaada amarka madaxwaynaha ee ku aadan hakinta dhulka raasiga ah.
“Wax kasta oo hanti qaran ah, oo ku baxay sifo khaldan, ciddey doontaa waa sharci-darro. Wixii aan sharci-darro ahaynina ma shaqeynaayo, sharciga ayaana shaqeynaya” Ayuu yidhi garyaqaan Cabdisamad Cumar Mal
Dhanka kale Garyaqaanka guud ee Somaliland waxa uu xusey in dadkii meeshaasi la siisyey haddii ay sifo sharci-darro ah ku heleen, oo xukuumaddu talaabo ka qaadey,, amarka xukuumadda ayaa soconaya. Garyaqaanka guud waxa uu sheegay in talaabada uu madaxwaynaha Somaliland Md. Muuse Biixi Cabdi uu qaadey ay tahay tallaabo sharci ah.
Dhulka danta guud oo uu garyaqaanku soo hadal qaadeyna waxa uu sheegay in aan loo isticmaali karin sifo sharciga ka baxsan.
Dhanka kale kadib markii uu madaxwaynaha Somaliland amarka ka soo saarey raasiga magaalada Berbera oo ay hore u bixisay xukuumaddii tan ka horeysay ee Siilaanyo ayaa waxa si adag uga soo horjeestay Maayirka Magaalada Berbera Cabdishakuur Cidin, taasi oo ka dhiggan in uu lug ku leeyahay bixinta dhulkaasi oo ahaa dhul ay hanti guud ah.
Raasiga Berbera Maxay Tahay Faa’iidada Ku Jirtaa?
Raasigu waa dhulyare dhererkiisu yahay 3.2 kiilomitar, oo badda Berbera hore u sii gashan, waxana uu ku caan yahay in uu yahay dugsi iyo gabbaad maraakiibta iyo doonyaha ka caabbiya kacdoonka badda. Ahaanshiiyaha ay magaalada Berbera ahayd, xilliyo aad u durugsan, marsada ugu magaca weyn xeebta dheer ee carriga Soomaaliyeed waxa door muhiim ah ka ciyaaray Raasigeeda dabiiciga ah, mana jiro ku kale oo la mid ah oo ku yaal xeebaha Carriga Soomaaliyeed. Haddii aanu Raasigaasi jiri lahayn, Berberana ma jirteen. Raasigani waxa uu ka dhigay Berbera goobta ugu habboon ee doonyihii iyo maraakiibtii hore ku soo xidhan jireen ama barroosinka dhigan karaan.
Tanni waxay ka dhiggan tahay raasiga Berbera haddii uu baaba’o in dekadda Berberana ayna ahaaneyn mid sii jirta. Raasiga ayaa hadda badh kamid ah ciid la soo dhoomiyey oo la buuxiyey taasina ay keenayso in uu baaba’o.
Ugu danbeyntiina magaalada Berbera ayaa muddooyinkii u danbeeyey waxa ka soo baxaayey cabooshooyin badan oo ku aadan in dhulkii hantida guud ahaa dad gaar ah la siiyey.
Qaar kamid ah xildhibaanada gollaha deegaanka Berbera oo qaar kood shaley warbaahinta la hadleen waxay xuseen in aanu maanta jirin dhul hanti guud ah oo ku yaala Berbera haddii uu jirana aanu ahayn wax lagu tilmaami karo hanti guud isla markaasina dhulkii hantiga guud la wada bixiyey iyada oon loo marin dariiq sharci ah.
Qoryaalenews – Hargeysa Desk
