Wasiirkii arrimaha dibedda ee dalka Zambia Henry Kalaba ayaa iska casilay xukuumadda dalkaas.
Henry Kalaba ayaa iscasilaaddiisa ku sheegay qoraal dheer oo uu ku baahiyey Shabakdda xidhiidhka Bulshada ee Facebook, isagoo ku eedeeyay dowladda uu ka tirsanaa musuqmaasuq, hunguri weyni iyo maamul xumo.
Balse, dadka siyaasadda u dhuun-daloola waxa ay sheegeen in iscasilaadda Wasiirku ay tahay cadaadis la saarayo Madaxweyne Dalkaasi Mr. Edgar Lungu oo markii saddexaad xilka isku soo sharaxaya, halka dastuurka dalkaas uu qabo in labo jeer oo kaliya uu qofka xilka hayo.
Henry ayaa la sheegay in uu isaga ka mid yahay Musharraxiinta Xisbiga talada haya ee isu taagi lahaa xilka madaxtinimada haddii Madaxweynuhu uu wadada u baneeyo.
Xafiiska Madaxtooyada ayaanan weli wasiirka ka helin wax warqad rasmi ah oo iscasilaad ah marka laga tago qoraalka Facebook uu ku daabacay.
