26 Dec (Qoryaalenews):- Dab weyn oo khasaare baaxad leh geystay ayaa Xalay 2dii habeennimo ka kacay Suuqa weyn ee Bacadlayaasha Magaalo ganacsiyeedka Wajjaale ee Somaliland.
Dabkan ayaa waxa uu ka bilaabmay Bacadlayaasha gaar ahaan qeybta xigta Togga magaalada wajjaale,waxaana ku baaba’ay Bakhaarro lagu qiyaasay inay kor u dhaafayaan 90 bakhaar sida dad goob joogayaal ahi xaqiijiyeen.
Goob jooge ay shabakada Qoryaale la hadashay ayaa sheegay in Illaa hadda aanu jirin wax khasaare nafeed ah oo ka dhashay dabkaasi, isla markaana aan la ogayn waxa rasmiga ah ee uu ka dhashay dabkaasi dhaliyay khasaaraha maaliyadeed ee baahsani.
Dabkan ayaa hadda la xakameeyay iyada oo Gurmadka deg degga ahi uga soo gurmaday magaalooyinka Boorama, Jig Jiga iyo Hargaysa.
Magaalada Wajjaale ayaa waxa kala qaybiya Xadka u dhexeeya Itoobiya iyo Somaliland halka dabku baab’iyayna waa qeybta Jamhuuriyadda Somaliland.
Wixii warar ah ee ka soo kordha kala Soco Shabakadda Qoryaale
