Warar kala duwan ayaa ka soo baxaya qarax miino oo subaxnimadii hore ee saaka magaalada Muqdisho lagula eegtay gadiidka ciidamada AMISOM.
Qaraxan ayaa ka dhacay sida ay goob joogayaal u sheegeen warbaahinta agagaarka wadadda Laamiga Warshadaha ee magaalada Muqdisho gaar ahaan Warshada Taraqa iyo Sigaarka, waxaana qaraxaasi lala eegtay kolonyo gaadiid ah ay la socdeen Ciidamada AMISOM.
Goobjoogayaal ayaa ku waramaya in gaadiidka ay wateen ciidamada AMISOM qaraxa lala eegtay xili ay marayeen laamiga Warshadaha, waxaana qaraxaasi miino uu waxyeelo gaarsiiyay mid kamid ah gaadiidkii ay wateen ciidamada AMISOM.
Ciidamada AMISOM ayaa qaraxa kadib rasaas xoogan kor u furay, waxa ayna ciidamada oo ka daatay gaadiidkii ay wateen markii dambe isaga dhaqaaqeen goobtii lagu qarxiyay iyaga oo horey u jiitay gaari waxyeelo kasoo gaartay qaraxaasi.
