Ciidamada badda ee dalka Shiinaha ayaa dekeda Bosaso keenay saddex Nin oo burcad-badeed Soomaaliya, kuwasoo gacanta lagu dhigay ka dib markii ay isku dayeen inay afduubaan Markab sitay Calanka Dalka Lubnaan bishii hore.
Saddexdan nin oo lagu kala magacaabo Maxmed Cabdulahi Maxmed, Cabdikariin Saalax maxmed (Aw-koombe), iyo Maxmuud Mahad Yuusuf, waxaa lagu wareejiyay Masuuliyiinta Ciidamadda Amniga maamul gobolleedka Puntland, waxaa kaloo lagu wareejiyay masuuliyiinta hubkii ay wateen burcad-badeedu.
Agaasimaha wasaaradda Dekedaha maamul gobolleedka PuntlandC/majiid samatar Jaafaan oo toddobaadkii hore warbaahinta la hadlay ayaa sheegay in burcadeeda markabka weerartay ay ahaayeen 5 nin, balse saddex nin ay gacanta ku dhigeen ciidamada shiinaha, labadii kalena ay haatan ku dhuumanayaan qaar ka mid degmooyinka gobolka Gardafuu ee Puntland.
Gabagabadii, Waa markii u horraysay muddo sannado ah maamul gobolleedka Puntland lagu wareejiyay Burcad-badeed ay soo qabteen ciidamadda Caalamiga ah ee ku sugan xeebaha Soomaaliya, waxaana la filayaa in dhowaan maxkamad la horkeeni doono sida ay sheegeen saraakiisha amniga Puntland.
