Guddoomiyaha Maxkamadda Sare Aadan Xaaji Cali, ayaa sheegay in ay dhiseen kalsoonida shacabku ku qabaan Garsoorka dalka, isla markaana qaybo badan oo ka jirtay maamul daadejinta Maxkamadaha ay wax badan ka qabteen Guddida Caddaaladdu.
Aadan_1496
Guddoomiyaha Guddida Caddaaladda Aadan Xaaji Cali oo khudbad ka jeediyey Bandhiga Caalamiga ah ee Buugta Hargeysa, gaar ahaan si qoto dheer uga hadlay doorka hay’adaha caaddaaladdu ku leeyihiin hoggaaminta waxa kale oo uu sheegay in Maxkamadaha iyo hay’adaha kala duwan ee garsoorka la gaadhsiiyey gobollada dalka.
“Qaybo badan oo garsoorka ka mid ah waxaannu gaynay gobollada dalka si qofka aan caasimada soo haleeli karayn uu uga helo halkaasi. Waxa annu wax ka qabanay dadkii laaluushka qaadan jiray ee maxkamadaha ka shaqaynayey iyo kuwii bixin jiray, iyadoo aannu dabogal ku samaynay. Sidoo kale waxaannu qaadanay shaqaale leh aqoonta sharciga oo u badan maamul.
Qofka caanka ah, kan masuulka iyo ka taajirka ahi waxay la sinmeen dadka caadiga ah oo kalsoonidii dadka wananu soo celinay in badan, maadaama dadka qaar maxkamaddaha wax kale ka aminsanayeen oo ay kaba cabsoon jireen haddii maxkamadda arrin ama kiis ka galo, waxaannu samaynay si aannu kalsonidaas u soo celino inaannu adkayno garsoorka iyo qareennada dadka u dooda oo dad aqoon leh oo dhisan keenno oo qofku ku kalsoonaan karo inuuu xaq badan soo dhicisan karo, markaa imika dadku way amineen garsoorka iyo maxkamadaha,” ayuu yidhi Guddoomiye Aadan X. Cali.
