 Jewiga Kulan Leydh Qabow Neefsaday Oo Labada Mas’uul Burcad Isu Mariyey Boggooda
Cabdicasiis Maxamed Samaalle Oo La Weriyey In Uu Dhawaan Shaacin Doono Taageerrada Musharraxa Madaxweynaha KULMIYE Iyo Qaban-qaabada Munaasibad Ceellalyo U Ah Wada-shaqayn Dhexdooda Ka Curanaysa.
Guddoomiyaha xisbul-xaakimka KULMIYE, ahna murrashaxa xisbiga Md Muuse Biixi Cabdi, ayaa markii ugu horraysay kulan fool ka-fool ah la yeeshay wasiirkii hore ee maaliyadda Somaliland Md Cabdicasiis Maxamed Samaale oo dhawaan kasoo laabtay safar uu carriga maraykanka ugu maqnaa.
Kulankan oo ahaa mid xogtiisa si weyn loo daahay, ayaa ka qabsoomay guriga uu Cabdicasiis Samaale ku leeyahay magaalada Hargeysa, waxana labadan siyaasi oo si weyn xiiso ugu qabay inay fadhiga noocan oo kale ah yeeshaan halkaas ku qaateen wakhti saacado ah.
Sida uu wargeyska Hubaal ku helay xogta, kulankani waxa uu ahaa mid labadan masuul ku wada qaateen afur, iyadoo si weyn iskaga xog waraystay arrimaha dalka, waxana ay si hufan uga doodeen baahida loo qabo in dhinac la iska dhigo qardoofooyinkii siyaasadeed ee hore u dhexmaray, kuwaas oo ay muddo kooban ku kala maqnaayeen.
Guddoomiye Muuse Biixi Cabdi iyo Cabdicasiis Samaale waxa halkaas ku dhexmaray wada-hadal iyo is xogwaraysi dheer, waxana ay si mug leh u lafo gureen waxyaabaha la kala tabanayo, iyagoo aakhirkiina mid waliba midka kale ka dhaahiyey waxa uu ka tabanayo ama uu ka tirsanayo.
Kulankan oo ay kasoo shaqeeyeen siyaasiyiin iyo waxgarad miisaan ku dhex leh xisbiga KULMIYE dhexdiisa, ayaa waxa uu mudane Cabdicasiis Maxamed Samaale ku caddeeyey inuu meel iska dhigayo wixii farqi dhinaca siyaasadda ah ee ka dhexeeya guddoomiye Muuse Biixi Cabdi, isla-markaana uu diyaar u yahay inuu wixii karaankiisa ah la shaqayn doono oo qaybtiisa ka qaadan doono dhisiddiisa iyo ka gun-gaadhististiisa la xidhiiidha hankiisa madaxweynenimo ee uu dalka ka leeyahay.
Cabdicasiis Maxamed Samaale waxa kale oo kulankaas ku caddeeyey inuu si dhab ah taageersan yahay guddoomiye Muuse Biixi Cabdi, waxana uu hoosta ka xarriiqay inuu meel iska dhigay qardoofadii ka dhalatay shirweynihiii golaha dhexe ee sanadkii hore xisbiga KULMIYE Hargeysa ku yeeshay, kaas oo sababay inuu Cabdisamaale aragti ka duwan qaato.
Waxyaabaha kale ee uu wasiirkii hore ee maaliyadda Somaliland Md Cabdicasiis Maxamed Samaale kulankaas ka caddeeyey, ayaa waxa kamid ah inay ka go’an tahay sidii uu qaybtiisa uga qaadan lahaa guul uu markale xisbiga KULMIYE Ka gaadho doorashooyinka sanadka soo socda dalka ka qorshaysan, kuwaas oo ay xisbiga ugu sharraxan yihiin guddoomiye Muuse Biixi Cabdi iyo Cabdiraxmaan CabdilaahiIsmaaciil Saylici.
Guddoomiye Muuse Biixi Cabdi, ayaa dhinaciisa farxad weyn ka muujiyey inay maskaxda iyo maankaba ka midoobeen Cabdicasiis Maxamed Samaale oo miisaan culus ku dhex leh xisbiga KULMIYE iyo bulshada dhexdeedaba, waxana uu muujiyey inay arrintaasi tahay guul cuddoon oo xisbiga usoo hoyatay, soona dedejin karta dedaalka loogu jiro inuu xisbigu markale hoggaanka dalka ku guulaysto.
Waxa uu guddoomiyuhu si weyn u majeertay midnimada qaangaadhnimada siyaasadeed ku dhisan ee ka dhex curatay isaga iyo Cabdicasiis Samaale, waxana ay labada masuul isku afgarteen in laga wada shaqeeyo guul uu xisbigu gaadho, taas oo haatan saansaankeedii muuqdo, maadaama siyaasiyiintii xisbiga ugu miisaanka cuslaa haatan gacmaha is haystaan. Cabdicasiis Maxamed Samaale waxa uu shaaca ka qaaday inuu dhawaan qabsan doono munaasibad ballaadhan oo uu ku shaacinayo taageeradiisa musharrax Muuse Biixi Cabdi, isla-markaana uu muruqiisa iyo maalkiisaba gelin doono guusha xisbiga KULMIYE ee uu xubinta ka yahay muddada badanna kusoo tabcayey.
Ex. Wasiir Samaale iyo guddoomiye Muuse Biixi waxa madashaas afurka ahayd ku dhexmaray kaftan si qoto dheer loogu lafoguray is-laabxaadhashada labada masuul oo midnimadoodu fure u noqon karta guusha xisbiga KULMIYE, waxana aakhirkii lagu kala tegay inay si walaaltinimo leh oo daacadi ku jirto u wada shaqayn doonaan.
Is laab-xaadhashada dhex martay guddoomiye Muuse Biixi Cabdi iyo Cabdicasiis Maxamed Samaale, ayaa Ah guushii labaad ee ay xisbiga KULMIYE iyo hoggaankiisu muddo toddoba cisho gudahood ah ay gaadhaan, maadaama maalmo ka hor xisbigu hantiyey Prof. Axmed Ismaaciil Samatar oo kamid ah siyaasiyiinta ugu miisaanka culus dalka, isla-markaana axsaabta kale oo dhammi tartan ugu jireen.
Sawirka Hoose Waa Muuse Iyo Samaale Oo Wada Fadhiya.
 Source:-Hubaal.
|
