“Cabdiraxmaan Cirro Waxaanu Wadaagnaa Qolo, Laakiin Dhiig iyo Dhimasho Waxaanu Wadaagnaa Muuse Biixi…”
“ Boqor Cismaanoow Waadigan Leh [Madaxtinimada] Dahab Baanu U Xaraashnay [Laakiin] Aniga Hayga Filin In Aan Cirro Baloodhkeyga U Bireeyo, Ragga Fikirkaas Qabana Ma Ihi, Waayo….”
“Saaxiibkay Hadalkiisa Waxaa Ku Jirtay In Cirro Isagoo Madaxnimo Doonaya Ay Haddana Reerkiisii Balloodho Haystaan”
Murankii xiisadda dhaliyey ee indhawaaleba ka oognaa dhulka tiyaatarka Hargeysa ee u dhexeeyey Ganacasde Cumar Caydiid iyo Suldaan Saleebaan Boqor Cismaan, isla markaana hadal hayntiisu toddobaadkii u dembeeyeyba uu saameeyey saaxadda siyaasadda ayaa isu rogay weji kale oo siyaasadeed.
Murankan oo markii uu soo baxay horseeday xadhiga Ganacsade Cumar Caydiid isla markaana ay qaybaha bulshadu siyaabo kala duwan uga hadleen qaddiyadaasi ayaa xaraaradiisu kor u kacday isla markaana weji kale oo siyaasi ah yeeshay kadib markii uu hoggaanka xibsiga mucaaridka ah ee xisbiga WADDNI lugaha la soo galay laba kacleyntiisa iyaga oo dawladda ku xidhiidhiyey in ay isku dhufasho beelleed uga dan leedahay hurintiisa. Xisbiga WADDANI oo tiraba dhawr jeer ka hadlay arrintan isla markaana xabsiga ku booqday intii uu xidhnaa Ganacsade Caydiid ayaa si ka duwan xaalladu sida ay tahay waxaa ay u naqdiyeen xadhigiisa oo ay sheegeen in looga jeedo isku dhufasho jufooyinka ay ka soo kala jeedaan Isaga iyo Suldaan Saleebaan oo beel ahaan ka tirsan Garxajis.
Muxuu Suldaan Saleebaan Ka Yidhi Arrintaasi?
Suldaan Saleebaan Boqor Cismaan oo isagu ah Madaacalayga ay qaddiyada dhulka tiyaatarku ka dhaxayso Ganacsade Caydiid isla markaana uu xisbiga WADDANI ku xidhiidhiyey in ay dawladdu ka dambayso ayaa shalay isaga oo warbaahinta kula hadlay Hargeysa waxaa uu ka hadlay laba arrimood oo uu midkood ku naqdiyey siyaasadda uu Guddoomiyaha WADDANI ka leeyahay farogelinta xiisaddan iyo hadal kasoo yeedhay Boqor Cismaan Aw Maxamuud Buurmadow oo uu isna jawaab ladifan ka bixiyey, isaga oo si farshaxamaysan uga jawaabay hadalka Boqorka.
Ugu Horeyn Suldaan Saleebaan Waxaa uu ka hadlay sooyaalka guddoomiyaha WADDANI oo uu sheegay in ay dhalasho ahaan is xigaan balse dhiig ahaan iyo dhaqan ahaan ay kala durugsan yihiin. Saleebaan waxaa uu sheegay in ay taariikhda somaliland qorayso qof kasta waxaa uu yahay iyo doorka uu ku leeyahay sooyaalka qarannimada Somaliland. “Wax kastaa taariikh bey leeyihiin, nin kastaana taariikh buu leeyahay oo waa la soo bandhigi, nin muhmal iyo madmadow iyo reernimo ku soogelaya Somaliland-na wallaahi baanu jiri doonin” ayuu yidhi Suldaan Saleebaan, isaga oo farta ku godaya guddoomiyaha WADDANI Cabdiraxmaan Cirro isla markaana is barbar dhigaya isaga iyo Guddoomiyaha KULMIYE “Cabdiraxmaan Cirro Aniguu Qolo ii xigaa oo aanu qolo wadaagnaa, laakiin dhiig iyo dhimasho waxaanu wadaagnaa Muuse Biixi, Somaliland-na isagay [Muuse] ayay wadaagaan, nimaan dhiiggu ugu oolinna wallaahi baanu xukunkeeda dhadhaminayn ee ha ku talogalo. Ninka baloodhkayga baadhbaadhayow, taariikhdaadaa dib loogu noqone”. Dhinaca kale waxaa uu sheegay Suldaan Saleebaan in aanay haba yaraatee jirin wax iska horkeen ah oo ay dawladdu ka dhex waddo beellaha walaalaha ah, waxaanu arrintaasi dhaqdhaqaajinteeda ku xidhiidhiyey xisbiga WADDANI oo uu sheegay in ay siyaasad xumo ka tahay “wax laba reer la iskaga hor keenayo oo ay dawladdu waddaa wallaahi baanay jirin ee wadwadkeedu waa siyaasad xumada WADDANI, oo ragga hoggaaminta qaranka u han weyn waa ragga ku wareegaysanaya dawladdaa isku dhufanaysa Cumar Caydiid iyo Suldaan Saleebaan, waxaasina waa barobogaandada WADDANI suuqa soo gelinayso ee ay dadka ku abaabulayso”. Ayuu yidhi Suldaanku.
Jawaabta Uu Suldaanku ka bixiyey hadalkii Buur-madow
“Saaxiibkay Boqor Cismaan Buur Madow waa nin aan aad ixtiraam badan ugu hayo, waanan ku raacsanahay marka uu leeyahay hala daayo hanjabaadda iyo qabyaallada Cawaale-suqaar lala taagan yahay, hadalkaasi waa hadal fiican ooaan ku raacsanahay oo uu meeshiisii mariyey, laakiin isaga oonagu tiirinaya inaanu qabiil ahaan cirro meel kasoo wada jeedno…” ayuu yidhi Suldaan Saleebaan, “ waxaa ku jirtay hadalkiisa in isaga oo Cirro Madaxnimo doonaya ay haddana reerkiisii balloodho haystaan, sida ay isu qabanayso ayaa hadalladiisa ku jirtay Boqor Buur madaw. Waxaan leeyahay anigu waa ta aan ka hadlayo oo kama mid ahi kuwa ku qanacsan in uu madaxtinimada doonto Cirro, mana istaahilo in Somaliland madaxtinimada loo saaro. [markaa] haddaad boqor Cismaanoow ii tirinayso Cirro, waxaan is leeyahay malaha adiga ayaa [taageerradiisa] iiga dhawe, anigu Cirro inuu hoggaaminta dalka doono nin u hawl galaya ma ihi, balloodhkayga uu madaxweynuhu u siiyeyna u bireyn maayo in uu cirro noqdo madaxweyne. Waadigan leh [annagu] dahab baanu u xaraashnaye aniga hayga filin inaan u bireeyo balloodhkayga cirro, waayo ma istaahilo in aan dalka madaxweyne uga dhigo, ragga fikirkaas qabana ma ihiye kuwa iyagu la jibaysan u sheeg.”. Saleebaan Wuu sii watay dooddiisa waxaanu intaa ku daray isaga oo sii xoojinaya hadalkiisa, “Anigu waxaan qabaa Cirro kii wax hoggaamin lahaa ma aha ee waa kii la hoggaamin lahaa ee dadka ku daba fayli lahaa ee weliba aamusi lahaa. Aniguna [Saleebaan ahaan] waxaan moodayay inaynu hoos isu ognahay adiga [buurmadow] malaha hadalkaasi aniga iguma dhacaynin ee meel kale ayaad ku wadday.”. ugudembeyna waxaa uu suldaanku sheegay inay shakhsi ahaan ka go’an tahay ilaalinta qaranimada isla markaana aan laga baryaynin adkaynta nabadgelyada “aniga nabadgelyada adkaynteeda iyo hagaajinta qaranimadu aniga waa igu waajib oo cid kasta waa ku waajib laakiin fidnada ragga wadoow waxa aad ka heshaan baad leedihiin”
