Wuxuu shirar beelaysan kula galay Hargeysa qaar ka mid ah oyadaasha iyo siyaasiyiinta ay isku deegaanka ka soo jeedaan oo uu cabashadiisa u gudbiyay
Hargeysa(QYN):- Wasiirka Wasaaradda Madaxtooyada Somaliland Maxamuud Xaashi Cabdi,ayaa laba maalmood ka dib ka duday Wasaaraddii uu xilkeeda la wareegay, ka dib markii ay u cuntami wayday wax ka bedel lagu sameeyay Wasaaradda markii loo magacaabay.
Wasiirka Wasaaradda Madaxtooyadu waxaa uu ka cadhooday qayb ka mid ah shaqadii ay Wasaaraddu qabanaysay intii uu Wasiir Xirsi joogay oo laga saaray isla markaana loo wareejiyay wasaaraddii hore looga soo qaaday ee Hawlaha guud taasoo ah Hay’adda Waddooyinka.
Wasiir Maxamuud Xaashi ayaan sadex maalmood ka soo xaadirin wasaaraddii uu kala wareegay Wasiirkii is casilay ee madaxtooyada oo ahayd meel uu in badan ku taamayay ka dib markii ay ku adkaatay kala dheegis lagu sameeyay wasaaradda iyo balamaha Madaxwaynaha iyo cidda la kulmaysa oo loo sameeyay cid gaar ah oo hawshaa u xilsaraan taasoo la sheegay in markii hore ay ka mid ahayd shaqada Wasiirka Madaxtooyada.
Wasiirka duday ayaa abaabulay kulamo beelaysan oo uu kaga cabanayo Wasaaradda loo dhiibay ee la kala dheegay iyo Hay’adda Waddooyinka ee laga hoos saaray.
Wasiir Xaashi ayaa kulan beelaysan waxaa uu kula yeeshay guriga Wasiirkii hore ee Qoyska iyo Arrimaha Bulshada Marwo Ilhaan siyaasiyiin ay isku beel yihiin waxaanu ugu Cawday in Wasaaraddii uu la wareegay la kala dheegay oo aanay sidii uu Xirsi Wasiirka kaga ahaa aanay ahayn taaloo suu ku tilmaamay in ay tahay wax aanu aqbalayn.
Waxaanu u sheegay in Wasaaradda lagu soo celiyo sideedii hore haddii kale uu u arko in la yaraysanayo oo aanu xilkaa haynayn.
Waxaanu ku cawday in laga xanqarsanayo oo balamihii muhiimka ahaa ee dadka la kulmaya Madaxweynahana loo sameeyay cid gaar ah oo hawshaa qabata oo isaga ka madax bannaan isla markaana aanu ka qayb galayn kulamada noocaas ah. Taasoo uu ku dooday in ay ka mid tahay waxyaabaha uu ku dareemay in la yaraysanayo oo Madatooyadu ka xanqarsanayso waxaa kale oo uu si weyn u diiday in Hay’addii waddooyinka laga hoos saaro wasaaradda loo dhiibay isla marlaana lagu celiyo wasaarad horeba looga hoos saaray.
Cabashada Wasiir Maxamuud Xaashi ula tegay siyaasiyiinta iyo waxgadaka ay isku beesha yihiin ayaa la sheegay in ay ku qanciyeen in uu shaqii ku noqdo oo uu tago Wasaaradda uu xilkeeda la wareegay waxyaabaha uu diidan yahayna ay Madaxweynaha kala hadli doonaan.
Maalintii shalay ayuu ku noqday Wasiirku shaqada Wasaaradda uu salauugay shaqadeeda waxaana la filayaa in arrintiisa ay ka odayayn doonaan siyaasiyiinta uu klamanada kala duwan la yeelanayay maalmihii ugu dambeeyay.
